"PAGGADAN KAY WILLIE JERUS, PAGGADAN SA KAMAWOTAN KAN PARA-OMA PARA SA SADIRING DAGA"

KARAPATAN Sorsogon
Media Statement
April16, 2007

"Daing ibang minaw-ot si Willie Jerus kundi magka-igwa nin sadiring daga ang mga para-oma tangani mabuhay. Daga ang buhay kan mga para-oma. Kun daing daga, dai nin katoninongan ang buhay kan mga para-oma," iyo ini ang paliwanang ni Ka Willie kan siya nabubuhay pa. Dai malilingawan ang saiyang pagmakulog sa namamanwaan sa paagi kan saiyang daing-takot na pagdara kan isyu na kinahahampang kan satong nasyon orog na ang mga para-oma.

Ang paggadan kay Ka Willie Jerus sarong "traydor na gibo" kan estado sa mga tawong militante asin minanindugan sa ikakarahay kan kadaklan. An padagos na panggagadan pagpapahiling kan kawaran nin "political will" nin gubyerno na pangatamanan ang seguridad asin buhay kan lambang syudadano.

Apesar kan mga lakdang na ginibo para maresolbahan extra-judicial killings, parehas kan imbestigasyon kan United Nations, dai man napondo na garadanan kundi nagpadagos pa.

Dai nin ibang dapat singilon kan kagadanan ni Ka Willie Jerus kundi ang rehimen ni Gloria Macapagal-Arroyo asin an Armed Forces of the Philippines (AFP) - Philippine National Police (PNP). Malinaw na sinabi ni UNSR Alston na "may kinaaraman ang AFP sa serye nin panggagadan asin ang gubyerno nasa "state of denial" o habo kaini mag-ako".

Sa maabot na eleksyon, dai nanggad dapat lingawan na an estado asin mga alipores kaini na kandidato dai nin puwang sa pwesto dahil ini mismo an minaraot san demokrasya kan nasyon asin buhay nin tawo.